تعلیق 4  [1]   (بسلسلہ: خلافت و ملوکیت، از ابن تیمیہ)

"اولی الامر" کی اصطلاح صرف اسلامی امارت  کے پیراڈائم میں

(مرزا قادیانی کی ایک سنتِ خبیثہ پر تنبیہ)

يَا أَيُّهَا الَّذِينَ آمَنُوا أَطِيعُوا اللَّهَ وَأَطِيعُوا الرَّسُولَ وَأُولِي الْأَمْرِ مِنْكُمْ     (النساء: 59)

اے ایمان والو! اطاعت کرو اللہ کی اور اطاعت کرو رسول (ﷺ) کی اور تم میں سے  اولی الامر کی۔

زمانۂ حاضر میں، جب سے ملت اسلام محکوم اور مغلوب ہے، یہ بات خصوصی طور پر نوٹ کرنے کی ہے کہ: آیتِ مذکورہ میں جہاں ’’اُولِی الۡاَمۡرِ‘‘ کا لفظ آیا ہے، یعنی ’’اختیار والے‘‘، وہاں ’’مِنکم‘‘ کا لفظ بھی ساتھ ہی آیا ہے یعنی ’’تم میں سے‘‘۔ ’’تم‘‘ سے مراد ظاہر ہے یہاں پر وہی ہوسکتے ہیں جو آیت میں اس سے متصل پہلے مذکور دو اطاعتوں (اَطِیۡعُوا اللّٰہَ وَاَطِیعُوا الرَّسُوۡلَ) کے پابند ہوں؛ اللہ کی توحید اور محمدﷺ کی رسالت کے مومن ہوں (آیت کا خطاب ہی ’’یَا أیُّھَا الَّذِیۡنَ آمَنُؤا‘‘ سے ہوا ہے نیز آیت کے اختتام پر ’’إنْ كُنْتُمْ تُؤْمِنُونَ بِاللَّهِ وَالْيَوْمِ الْآخِرِ‘‘ کے الفاظ بول کر وہ ’’ایمان‘‘ بھی بتادیا گیا ہے جو یہاں معتبر ہے؛ پس اِس مقام پر ’’مِنۡکم‘‘ کی بابت ابہام اٹھانا چہ معنی؟)۔

’’اولی الامر‘‘ کا درست سیاق اور صحیح محل واضح رہنا... یہ ان بنیادی ترین حقیقتوں میں سے ایک ہے جو مسلمانوں کے یہاں معروف چلی آئی ہیں؛ اور جس کے باعث اِس ’’تیسری اطاعت‘‘ کا اطلاق صرف اور صرف اسلامی امارت اور خلافت کے پیراڈائم میں رہتے ہوئے کیا جاتا رہا ہے؛ اور اس سے نکلنا سراسر الحاد باور ہوتا رہا ہے۔مگر دورِ حاضر میں مرزا غلام قادیانی نےاسلام کی ان تعلیمات کو جو ’’اولی الامر کی اطاعت‘‘ سے متعلق آئی ہیں ’’انگریزی اقتدار کا مطیع وفرماں بردار بن رہنے‘‘ پر بھی بےدریغ لاگو کیا؛ اور یوں اسلامی تاریخ میں وہ ایک ایسی سنتِ خبیثہ کا بانی ہوا جسے بعدازاں کئی ’غیرقادیانی‘ طبقے بھی طریقے طریقے سے مسلمانوں میں رائج کروانے کی کوشش کرتے رہے ہیں، بلکہ الفاظ وتعبیرات کے ہیرپھیر کے ساتھ ابھی تک کرتے چلے آرہے ہیں۔ اس ’نقطۂ نظر‘ کے داعی کسی وقت ’تکلف‘ برطرف کریں یاکھل کر اپنی بات کہنے کی ’آزادی‘ پائیں (جس کے نہ ہونے کا اِن کو اکثر گلہ رہتا ہے؛ لہٰذا اس ’حق گوئی‘ کےلیے کسی وقت ان کو جلاوطنی کی سہولت اختیار کرنا پڑتی ہے!)  تو اس میں یہ کوئی باک محسوس نہ کریں گے کہ قرآن کے ’’اولی الامر‘‘ کا اطلاق یہ تاجِ برطانیہ اور وائٹ ہاؤس  تک پر کر آئیں۔ ملکہ وکٹوریہ کی اطاعت اور وفاداری کو بھی یہ نکتہ ور اُنہی قرآنی دلائل سے ثابت کردیں گے جن سے آپ اسلامی خلافت کی اطاعت و وفاداری کو واجب ٹھہراتے رہے ہیں! قرآنی ’’اولی الامر‘‘ سے مراد ان کے ہاں مطلق ’اتھارٹی‘ ہوجاتی ہے نہ کہ ’’دینِ اسلام‘‘ کی پابند اتھارٹی۔ زیادہ سے زیادہ یہ اُس کے ’جمہوری طور پر منتخب‘ ہونے کی شرط لگائیں گے؛ البتہ ’’پابندِ شرعِ محمدی‘‘ ہونے کی شرط لگانا غیر متعلقہ اور غیرضروری ہی جانیں گے (کیونکہ اتھارٹی کا سرچشمہ ہیں ہی ’عوام‘ نہ کہ ’’شرعِ خداوندی‘‘! قرآنی حوالے مانند ’’اولی الامر‘‘ یا ’’معروف و منکر‘‘ وغیرہ تو صرف اس ہیومن اسٹ پیراڈائم کی تائید میں پیش کرنے کےلیے ہیں؛ یہ کوئی اُس سے ٹکرانے کےلیے تھوڑی ہیں!)۔