[1]    ہمارے کچھ ’روشن خیال‘ اِس آیت کو بنیاد بنا کر آج اِس بات کو معیوب ٹھہرانے لگے کہ ہم نصاریٰ کو ’خدا کا بیٹا‘ ماننے ایسا عقیدہ رکھنے پر مستوجبِ ہلاکت یا یہود کو نبی آخرالزمانﷺ پر ایمان نہ لانے کے باعث ایک گمراہ ٹولہ جانیں! حالانکہ ایسی وعیدیں قرآن میں جابجا درج ہیں اور یہود و نصاریٰ کو سنانے کےلیے ہی بیان ہوئی ہیں۔ اُن کی اِن ضلالتوں کو جو قرآن میں بیان ہوئیں، سامنے لانا غلط کیونکر ہو سکتا ہے؟ سورۃ البقرۃ کی اِس آیت کا مقصود دراصل اہل کتاب کے ہاں پائے جانے والے ایک گروہی زعم اور گھمنڈ کا بیان ہے۔ تفاسیر سے یہی ظاہر ہے۔ ورنہ’ ’لَسۡتُمۡ عَلىٰ شَیۡءٍ ‘‘ ایسے عین یہی الفاظ المائدۃ میں قرآن یہود و نصاریٰ کےلیے خود استعمال فرماتا ہے:

قُلْ يَا أَهْلَ الْكِتَابِ لَسْتُمْ عَلَىٰ شَيْءٍ حَتَّىٰ تُقِيمُوا التَّوْرَاةَ وَالْإِنجِيلَ وَمَا أُنزِلَ إِلَيْكُم مِّن رَّبِّكُمْ ۗ وَلَيَزِيدَنَّ كَثِيرًا مِّنْهُم مَّا أُنزِلَ إِلَيْكَ مِن رَّبِّكَ طُغْيَانًا وَكُفْرًاۖ      فَلَا تَأْسَ عَلَى الْقَوْمِ الْكَافِرِينَ                                                                                                                                                                                                (المائدۃ: 68)

تم فرمادو، اے کتابیو! تم کچھ بھی نہیں ہو جب تک نہ قائم کرو توریت اور انجیل اور جو کچھ تمہاری طرف تمہارے رب کے پاس سے اترا۔ اور بیشک اے نبیؐ! وہ جو تمہاری طرف تمہارے رب کے پاس سے اترا اس میں بہتوں کو شرارت اور کفر کی اور ترقی ہوگی۔ تو ایسے کافروں کا تم کچھ غم نہ کھاؤ۔

اِس لَسۡتُمۡ عَلىٰ شَیۡءٍ ’’تم کچھ بھی نہیں ہو‘‘ کا سیاق، جیساکہ تفسیر طبری اور قرطبی وغیرہ سے واضح ہے، یہود و نصاریٰ کا رسالت محمدی پر ایمان کے مسئلہ میں توریت و انجیل کے لکھے سے اعراض کرنا ہے۔ پس خاص ایسی باتوں کی بنیاد پر جو صاف آسمانی وعیدوں کی زد میں آئیں، اہل کتاب کو ’’کچھ نہ جاننا‘‘ خود قرآنِ مجید ہی کی تعلیم ہے۔  سورۃ البقرۃ کے اس مقام کا اشارہ ایک خاص گروہی نخرہ و زعم کی جانب ہے جس کے تحت یہود و نصاریٰ ایک دوسرے کو ’کچھ نہیں‘ جانتے تھے؛ یہاں تک کہ ایک گروہی ضد میں آ کر وہ ایک دوسرے کے حق عقیدہ کو جھٹلانے لگتے، جیساکہ تفاسیر سے ظاہر ہے۔