بی بی سی! پاس کر یا برداشت کر!

احمد شاکر

بی بی سی کی حد سے بڑھی ہوئی شوخی ایک الگ موضوع ہے۔ مثلاً اس کی آج ہی کی لگائی ہوئی ایک سرخی: ’قندیل مردوں اور مولویوں کےلیے خطرہ تھیں‘ تاہم ترکی کی ناکام ’کو‘ پر بی بی سی کا دکھ زیرنظر مضمون میں شیئر کرنے کی کوشش کی گئی ہے:

آئرش   مصنفہ الیزبتھ بوون  نے کہیں لکھا تھا: "حسد  دراصل مسکراتے دشمنوں  کے سامنے خود کو اکیلا محسوس کرنا ہے۔ " شائد یہ اسی تنہائی کا احساس  ہےکہ بی بی سی کی ویب سائٹ اردوغان کے خلاف ایک نرالی منطق پیش کررہی ہے۔ اردوغان کو نیلسن منڈیلا نےنصیحت تو کبھی نہیں  کی لیکن اس بے چارے  کے کندھے پر بندوق رکھ کر ادرارتی بورڈ نے نشانوں کی مشق ضرور کرلی اور ویسے بھی قبر سے نیلسن منڈیلا کا تردیدی بیان آنے سے رہا!لہذا آم کے آم ،گٹھلیوں کے دام ! اور  شائد ایسی ہی دانش وری پر کہتے ہیں : ہونہار بروا کے چکنے چکنے پات۔ خیر یہ چکنے چکنے پات تو ان کے یہاں  روز ہی دیکھنے کو مل جاتے ہیں اس لیے  اب بی بی سی کی ویب سائٹ پر جاتے ابکائی سی آنے لگی ہے۔گویا ویب سائٹ نہ ہوئی کچرا کنڈی ہوگئی۔

خیر لبِ لباب اس بھڑاس کا یہ ہے کہ میاں اردوغان!اگرچہ تمہیں چھرا گھونپنے کی کوشش تو ہم نے خوب کی تھی جو فوجیوں کی نالائقی سے ناکام ہوگئی اب بس تم یوں کرو کہ یہ لو چھرا اور خود ہی اپنے پیٹ میں بھونک دو! کیونکہ میاں اردوغان! بی بی سی کہتا ہے کہ ہار یا جیت سے بڑی بات لوگوں کے دلوں میں گھر کر جانا ہے۔ لہٰذا اگرچہ تم لوگوں کے دِلوں میں گھر کر کے ہی اقتدار میں بیٹھے ہو اور لوگوں کے دِلوں میں گھر کرکے ہی فوجی بغاوت سے بچے ہو لیکن اب یوں کرو کہ بس تم اتر جاؤ اور یہ منطق تمہاری سمجھ میں نہ آئے تو بس مان لو کہ ایسا کروگے نا تو تم لوگوں کے دِلوں میں گھر کرجاؤ گے!اور زیادہ سوال نہ کرو! بس مان لو! یار مان لو بی بی سی جو کہہ رہا ہے ! ارے بس  مان جاؤ!

اب اسے دِلی خواہش کہیں یا  بوٹوں کی ناکامی  کا غم یا غمِ دوراں یا غمِ فرنگ! جو بھی یہ ہے ، ہے  یہ کمال کا! یعنی عوام کے پیٹ میں لات بھی ماری اور گال بھی چوما ۔ ایسی پیچیدہ باتیں آپ کی سمجھ میں نہ آتی ہوں توکوئی  مسئلہ نہیں!ایسی معرفت کی باتیں عام لوگوں کے پلے نہیں پڑتیں!اس کے لیے بی بی سی کی ملازمت درکار ہے۔ ان شاءاللہ دوسرے مہینے ہی نِروان حاصل ہوجائے گا۔

اب میرے پاس چھ سات تصویریں تو ہیں نہیں کہ مضمون لمبا کرنے کے لیے درمیان میں خواہ مخواہ لگاتا رہوں لہٰذا بی بی سی کےادارتی بورڈ  کو میرا مختصر مشورہ یہی ہے کہ جب تک ڈالر اور بوٹ کامیاب  نہیں ہوتے تب تک : پاس کر،یا برداشت کر!